2023/05/26ko prentsa-oharra

IRAKASKUNTZA PUBLIKOAREN GASTU ETA FINANTZAKETAREN ESTATISTIKA. 2021

Ikasleko irakaskuntzako gastua Euskal AEko ikastetxe publikoetan % 13,6 handitu da 2017/18 eta 2020/21 ikasturteen artean

2020/21 ikasturtean, irakaskuntza publikoetako gastu osoa 2.222 milioi eurokoa izan da

Ikastetxe publikoetan, ikasleko irakaskuntza-gastua 6.795 eurokoa da, 2020-2021 ikasturtean; alegia, % 13,6ko igoera egon da 2017-2018 ikasturtearen aldean, Eustaten datuen arabera. Irakaskuntzako gastuaren zenbateko osoa 2.038 milioi eurokoa da, eta % 11,5eko hazkuntza izan da. Gastu horrez gainera, jarduera eta zerbitzu osagarriena eta kapitalena ere kontuan hartzen baditugu, gastu osoa 2.222 milioi eurokoa da.

Ikastetxe publikoetako gastuaren zati handiena, % 96,5, jarduera arruntak ordaintzera bideratzen da, eta gainerakoa, % 3,5a, inbertsioetara. Bestalde, gastu arrunta, 2.145 milioi euro honela banatzen da: % 95, irakaskuntzara bideratzen da zuzenean, eta kapitulu esanguratsuena pertsonalaren gastuena da, % 91,5 baitagokio epigrafe horri; % 4,2 jantokiko eta eskola-garraioko zerbitzu osagarrietara bideratzen da, nagusiki.

Emandako irakaskuntza-motaren arabera, unibertsitatearen aurreko erregimen orokorreko irakaskuntza-mailak ematen dituzten ikastetxeei gastu osoaren % 75,3 dagokie, eta unibertsitateari % 19,6, eta erregimen bereziko irakaskuntza-zentroei (artistikoak) gainerako % 5,1a. Ez da desberdintasun esanguratsurik antzematen 2020/21 ikasturte honen eta aurrekoen artean.

Ikastetxe publikoetan, eskola-unitateko irakaskuntza-gastuak, Haur Hezkuntzan, 112.570 €-koak dira, eta Lehen Hezkuntzan, 103.764€-koak. Erdi-mailako irakaskuntzetan, 152.127 €-koak Derrigorrezko Bigarren Hezkuntzan, 208.902 €-koak Batxilergoan eta 176.307 €-koak eta 172.208 €-koak erdi- eta goi-mailako Lanbide Heziketan, hurrenez hurren.

Ikasleko irakaskuntza-gastuak 7.589 €-koak dira Haur Hezkuntzan, eta, Lehen Hezkuntzan, 6.561 €-koak. Erdi-mailako irakaskuntzetan, 8.733 €-koak dira Derrigorrezko Bigarren Hezkuntzan, 8.582 €-koak Batxilergoan eta 9.791 €-koak eta 8.788 €-koak erdi- eta goi-mailako Lanbide Heziketan, hurrenez hurren. Arte-irakaskuntzetan, Hizkuntzak, Musika, Dantza eta Arteak eta Ogibideak sartzen dira, eta gastu horiek 2.181 €-koak dira ikasleko. Azkenik, unibertsitate-irakaskuntzan, ikasleko gastua 8.400 €-koa da.

Unitateko irakaskuntza-gastuak % 13,5 hazi dira 2020-2021 ikasturtean, 2017-2018 ikasturtearen aldean, ikasleko irakaskuntza-gastuen hazkuntza ia bera, % 13,6 egin baitute gora. Azken horiek, gainera, unibertsitate- eta arte-ikasketak barne hartzen dituzte, eta unitateko gastua unibertsitatearen aurreko mailen erregimen orokorreko ikasketetarako baino ez da kalkulatzen.

Ikasleko irakaskuntza-gastua nabarmen hazi da Haur Hezkuntzan (% 27,3), eta Lehen Hezkuntzan % 15,4 hazi da, DBHn % 12,4 eta Batxilergoan % 2,9; % 6,3 jaitsi da, berriz, erdi-mailako Lanbide Heziketan. Goi-mailako Lanbide Heziketan ikasleko gastua ere handitu da, % 2,4, eta goi-mailako ikasketetan, berriz, nahiko egonkor mantentzen da (–% 0,3). Arte-irakaskuntzetan, ikasleko irakaskuntza-gastuak % 42,6 egin du gora ikasturte honetan, 2017/18 ikasturtearekin alderatuta.

2020-2021 ikasturtean, ikastetxe publikoen sarrera osoa 2.252 milioi eurokoa izan da; % 96,3 sarrera arruntari dagokio eta % 3,7, kapital-sarrerari. Sarrera arruntaren osagai nagusiak dirulaguntza publikoak dira, guztizkoaren % 94,1. Iturri pribatuei % 5,7 dagokie, nagusiki irakaskuntza-kuoten (% 2,4) eta jarduera eta zerbitzu osagarrien (% 2,6) bidez.

Argibide gehiagorako:

Eustat - Euskal Estatistika Erakundea / Instituto Vasco de Estadística Donostia-San Sebastian kalea, 1 01010 Vitoria-Gasteiz Prentsa Zerbitzua: servicioprensa@eustat.esTel.: 945 01 75 62